ಕಿರುತೆರೆಯಲ್ಲಿರುವ ಎಲ್ಲಾ ಶ್ರಮಜೀವಿಗಳ ಏಳಿಗೆಗಾಗಿ…

ಮನುಷ್ಯ ಹುಟ್ಟಿದಾಗ ಮಾತ್ರ ಒಂಟಿ, ಆನಂತರ ಹತ್ತು ಹಲವಾರು ಸದಸ್ಯರಿರುವ ಕುಟುಂಬದಿಂದ ಹಿಡಿದು ಶಾಲೆ, ಕಛೇರಿ ಹೀಗೆ ತಾನು ಹೋದಲ್ಲೆಲ್ಲಾ ಸಾಕಷ್ಟು ಸ್ನೇಹ ಬಳಗ ಹೊಂದಿ ಸಂಘ ಜೀವಿಯಾಗಿದ್ದಾನೆ. ಮನುಷ್ಯ ಒಂಟಿಯಾಗಿ ಏನನ್ನು ಸಾಧಿಸಲು ಸಾಧ್ಯವಿಲ್ಲ. ಒಂಟಿಯಾಗಿ ಬದುಕಲು ಸಾದ್ಯವಿಲ್ಲ. ಒಂಟಿಯಾಗಿ ನಡೆದಷಷ್ಟೂ ದಣಿವು ಜಾಸ್ತಿ, ಮಾನವನಾಗಿ ಹುಟ್ಟಿದ ಮೇಲೆ ಬಡವನಿರಲಿ ಶ್ರೀಮಂತರಿರಲಿ ಎಲ್ಲರಿಗೂ ಸುಖ ದುಖಃ, ನೋವು ನಲಿವು ಎಲ್ಲವೂ ಸರ್ವೇ ಸಾಮಾನ್ಯ. ನಮಗೆ ಖುಷಿಯಾದಾಗ ಅದನ್ನು ವ್ಯಕ್ತಪಡಿಸುವುದಕ್ಕಾದರೂ ನಮ್ಮದೇ ಆದ ಒಂದು ಸಂಘ ಬೇಕು, ದುಃಖದಲ್ಲಿದ್ದಾಗ ನಮ್ಮ ಅಳಲನ್ನು ತೋಡಿಕೊಳ್ಳಲು ಒಂದಷ್ಟು ಜನರ ಅಗತ್ಯ ನಮ್ಮೆಲ್ಲರಿಗೂ ಖಂಡಿತ ಇದೆ. ಅದರಂತೆ ಕಿರುತೆರೆಯಲ್ಲಿರುವ ಎಲ್ಲಾ ಶ್ರಮಜೀವಿಗಳ ಏಳಿಗೆಗಾಗಿಯೇ ಇರುವ ಸಂಘವೇ ನಮ್ಮ ಈ ಕೆಟಿವಿಎ.

ಕೆಟಿವಿಎ ಸದಸ್ಯತ್ವ ಏಕೆ ಪಡೆಯಬೇಕು ಎಂಬ ಪ್ರಶ್ನೆ ಹಲವಾರು ಜನರಲ್ಲಿ ಮೂಡಿರುತ್ತದೆ. ಕೆಟಿವಿಎ ಸದಸ್ಯತ್ವ ಪಡೆಯುವುದರಿಂದ ಖಂಡಿತ ನಿಮಗೆ ಲಾಭವಿದೆ. ಎಲ್ಲರೂ ದಿನನಿತ್ಯ ಅವರವರ ಕೆಲಸದ ಒತ್ತಡದ ಮಧ್ಯೆಯೂ ಕೆಟಿವಿಎ ಎಲ್ಲರನ್ನು ಒಟ್ಟುಗೂಡಿಸಲು ಒಂದಿಷ್ಟು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತದೆ. ನಾವು ಅವುಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿ ಖುಷಿ ಪಡಬಹುದು. ಎಲ್ಲರೊಟ್ಟಿಗೆ ಕಾಲ ಕಳೆಯಬಹುದು. ಒಟ್ಟಾರೆಯಾಗಿ ನಾವೆಲ್ಲರೂ ಒಗ್ಗಟ್ಟಾಗಿರಬಹುದು. ಸ್ವಲ್ಪ ದಿನಗಳ ಹಿಂದೆಯಷ್ಟೇ 2022-23ನೇ ಸಾಲಿನ ಕ್ರಿಕೆಟ್ ಟೂರ್ನಮೆಂಟ್ ಅನ್ನು ಕೆಟಿವಿಎ ಹಮ್ಮಿಕೊಂಡಿತ್ತು. ಅದರಲ್ಲಿ ಎಲ್ಲರೂ ಭಾಗವಹಿಸಿದ್ದ ರೀತಿ ಶ್ಲಾಘನೀಯ. ಈ ಟೂರ್ನಮೆಂಟ್ ಯಶಸ್ವಿ ಹಿನ್ನಲೆ ಮುಂದಿನ ದಿನಗಳಲ್ಲಿ ಲೆದರ್ ಬಾಲ್ ಟೂರ್ನಮೆಂಟ್, ಬ್ಯಾಡ್ಮಿಂಟನ್ ಟೂರ್ನಮೆಂಟ್, ಕೇರಮ್ ಟೂರ್ನಮೆಂಟ್‌ಗಳನ್ನು ಆಯೋಜಿಸುವ ಸಕಲ ಕಾರ್ಯಗಳು ಪ್ರಗತಿ ಪಥದಲ್ಲಿ ಸಾಗುತ್ತಿವೆ. ಅಷ್ಟೆಲ್ಲದೇ ಚಿತ್ರೀಕರಣದಲ್ಲಿ ತೊಂದರೆಗಳಾದಲ್ಲಿ ಕೆಟಿವಿಎ ಸದಾ ನಿಮ್ಮೆಲ್ಲರ ಬೆಂಬಲಕ್ಕಿರುತ್ತದೆ ಹಾಗೂ ನಾವುಗಳು ಈ ಸಮಾಜದ ಒಂದು ಭಾಗವಾಗಿರುವುದರಿಂದ ಸಾಮಾಜಿಕ ಕಳಕಳಿಯ ಒಂದಷ್ಟು ಕೆಲಸಗಳನ್ನು ಮಾಡುವುದು ನಮ್ಮೆಲ್ಲರ ಜವಾಬ್ದಾರಿ ಕೂಡ ಹೌದು. ಬಡ ಕಲಾವಿದರಿಗೆ, ತಂತ್ರಜ್ಞರಿಗೆ ಆರ್ಥಿಕ ನೆರವು ನೀಡುವ ಮುಖಾಂತರ ಆರ್ಥಿಕ ಭದ್ರತೆಯನ್ನು ಹೆಚ್ಚಿಸುವ ಕಡೆಯೂ ಕೆಲಸ ಮಾಡುತ್ತದೆ ನಮ್ಮ ಕೆಟಿವಿಎ.